ប្រជាពលរដ្ឋប្រមាណមួយភូមិជាច្រើនគ្រួសាររស់នៅភូមិព្រៃខ្លុងឃុំពោធិ៍ចំរើន ស្រុកបសែត ខេត្តកំពង់ស្ពឺ បានរងផល់ប៉ះពាល់យ៉ាងធ្ងន់ធ្ងរដោយមូលហេតុម្ចាស់កសិដ្ឋានចិញ្ចឹមជ្រូក១កន្លែង  មិនអនុវត្តតាមបច្ចេកទេស ដោយបង្ហូរអាចម៍ជ្រូកចូលក្នុងទំនប់ទឹកប្រើប្រាស់របស់ប្រជាពលរដ្ឋ ប្រើប្រាស់លេងកើតភាយក្លិនស្អុយចេញមក និងប៉ះពាល់ដល់សុខភាពប្រជាជនរស់នៅក្នុងភូមិ។

ក្រុមអ្នកភូមិអះអាងថា កន្លងមកដោយមានការផ្ទុះការតវា៉និងប្តឹងផ្តល់ពីសំណាក់ពលរដ្ឋទៅកាន់អជ្ញាធរមូលដ្ឋានកសិដ្ឋាន១កន្លែងនេះបានផ្អាកបង្ហូរអាចម៍ជ្រូកត្រឹមមួយសប្តាហ៍ប៉ុណ្ណោះក្រោយមកក៏ធ្វើការបង្ហូរអាចម៍ជ្រូកចូលក្នុងទំនប់ទឹករបស់ពលរដ្ឋវិញដដែលមិនបានធ្វើតាមបច្ចេកទេសដែលមន្ត្រីជំនាញនិងអជ្ញាធរណែនាំនោះទេ និងបង្កឲ្យប៉ះពាល់សុខភាពប្រជាពលរដ្ឋនិងសត្វពាហនៈយ៉ាងពេញបន្ទុក។

ម្យ៉ាងទៀត ប្រជាពលរដ្ឋលើកឡើងថា ម្ចាស់កសិដ្ឋានចិញ្ចឹមជ្រូកនេះមិនខ្លាចញញើត ឬកែប្រែឥរិយាបថឡើយ បើទោះបីជាអាជ្ញាធរភូមិឃុំក៏បានចុះណែនាំច្រើនដងហើយក៏ដោយ។

ករណីនេះ ក្រុមប្រជាពលរដ្ឋបានស្នើទៅមន្ទីរកសិកម្មរុក្ខាប្រមាញ់ និងនេសាទខេត្ត និងមន្ដ្រីពាក់ព័ន្ធផ្សេងទៀតជួយអន្ដរាគមន៍ និងមានវិធានការទៅលើកសិដ្ឋានចិញ្ចឹមជ្រូកនេះផងទាន៕. 

  អង្គភាពយេីងខ្ញុំរងចាំការបំភ្លឺជូនពីម្ចាស់កសិដ្ឋាន រាល់ម៉ោងធ្វើការ ៕