លោកឧត្តមសេនីយ៍ទោ សាត គឹមសាន ផ្សព្វផ្សាយការពង្រឹងវិធានការរឹតបន្តឹងការអនុវត្តច្បាប់ចរាចរណ៍ផ្លូវគោកដល់ថ្នាក់ដឹកនាំនិងមន្រ្តីនគរបាលចរាចរណ៍៖
នៅព្រឹកថ្ងៃសុក្រ២កេីតខែភទ្របទឆ្នាំថោះបញ្ចស័កព.ស.២៥៦៧ ត្រូវនឹងថ្ងៃទី១៦ខែកញ្ញាឆ្នាំ២០២៣អនុវត្តតាមអនុសាសន៍ដឹកនាំរបស់ឯកឧត្តម នាយឧត្តមសេនីយ៍ ស ថេត អគ្គស្នងការនៃអគ្គស្នងការដ្ឋាននគរបាលជាតិ កាលពីថ្ងៃទី១៤ខែកញ្ញាឆ្នាំ២០២៣ក្នុងកិច្ចប្រជុំស្តីពីការអនុវត្តវិធានការរឹតបន្តឹងអនុវត្តច្បាប់ចរាចរណ៍ផ្លូវគោក ក្នុងក្របខណ្ឌទូទាំងប្រទេសនៅទីស្តីការក្រសួងមហាផ្ទៃ នោះរួចមកលោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង បានធ្វេីការប្រជុំផ្សព្វផ្សាយផែនការនេះដល់ថ្នាក់ដឹកនាំ និងមន្រ្តីនគរបាលចរាចរណ៍នៅក្នុងសាលប្រជុំធំបរិវេណស្នងការដ្ឋាននគរបាលខេត្តបាត់ដំបង ដែលកិច្ចប្រជុំនេះមានការចូលរួមពីលោក លោកស្រីជាស្នងការរង អនុប្រធានផែន នាយ នាយរងការិយាល័យជំនាញពាក់ព័ន្ធ លោក អធិការនគរបាលក្រុង ស្រុកនិងមន្រ្តីនគរបាលដែលអនុវត្តការងារនេះជាច្រេីនរូប។
តាមអនុសាសន៍របស់ឯកឧត្តម នាយឧត្តមសេនីយ៍អគ្គស្នងការនគរបាលជាតិ គឺបានទុករយៈពេល ៧ថ្ងៃ ដើម្បីឱ្យមន្រ្តីនគរបាលធ្វើការផ្សព្វផ្សាយដល់មហាជនឱ្យបានទូលំទូលាយជាមុនសិនមុនពេលនគរបាលចុះអនុវត្តច្បាប់ ដោយគូសបញ្ជាក់អំពីគោលបំណងនៃការអនុវត្តច្បាប់ របស់នគរបាលជៀសវាងមានការរិះគន់ពីប្រជាពលរដ្ឋក៏ដូចមហាជនទូទៅ។
ក្នុងកិច្ចផ្សព្វផ្សាយនេះលោកឧត្តមសេនីយ៍ទោ សាត គឹមសាន បានណែនាំដល់គ្រប់មន្ត្រីនគរបាលចរាចរណ៍ទាំងអស់ ត្រូវគោរពឱ្យបាននូវវិន័យលេខ០០៦ របស់កងកម្លាំងនគរបាលជាតិ និងបទបញ្ជាដែលបានដាក់ឱ្យអនុវត្ត ពិសេសបំពេញការងារប្រកបដោយតម្លាភាព សុក្រិត្យភាព ប្រកបដោយវិជ្ជាជីវៈនិងក្រមសីលធម៌ ល្អ រាល់ពាក្យសំដីអាកប្បកិរិយាទន់ភ្លន់តែហ្មឺងម៉ាត់ក្នុងការងារ មិនបង្កឱ្យមានការថ្នាំងថ្នាក់ពីមហាជន ចំពោះ អ្នកល្មេីសច្បាប់ត្រូវធ្វេីយ៉ាងណាឱ្យគាត់ហ៊ានទទួលយកនូវកំហុសរបស់គាត់ដោយរីករាយ ហេីយមិនបង្កនូវកំហុស សារជាថ្មីទៀត។
ជាមួយនេះមន្រ្តីនគរបាលគ្រប់រូបត្រូវធ្វេីជាគំរូល្អដល់មហាជនក្នុងការអនុវត្តការងារនេះ និងផ្សព្វផ្សាយបន្តដល់ សាច់ញ្ញាតិ បង ប្អូន កូនចៅ ក្រុមគ្រួសាររបស់ខ្លួនឱ្យចូលរួមអនុវត្តច្បាប់ឱ្យបានទាំងអស់គ្នាដេីម្បីអាយុជីវិត របស់យេីង៕
